انت كنت تعرف قبل كدا ان عمرو دياب أصيب بمرض الإيدز، أيوه زي ما سمعت كدا ..
عمرو دياب المطرب الشهير المحبوب دا جاله الإيدز .. ودا أصلا كان السبب الأساسي في انفصاله عن مراته اللي كان بيحبها جدا، الفنانة شيرين رضا، بعد خناقة كبيرة حصلت بينهم لما جاتله نتيجة التحاليل على البيت واكتشتفت شيرين ان جوزها وأبو بنتها عنده الإيدز، ودا طبعا مرض مبيجيش بسبب أكل الشارع، لكن زي ما احنا عارفين بييجي بسبب العلاقات الجنسية المتعددة ..

بس المرض دا اتنقل لعمرو دياب منين ؟ دا اللي هنعرفه دلوقتي ..

في مكتب منتج فني شهير قابل عمرو دياب بنت روسية كانت جاية مصر تدور على أي شغل، والمنتج دا شاف فيها موديل كويسة للإلاعلانات والكليبات، البنت بصراحة كانت جميلة جدا لدرجة ان عمرو دياب أول ما شافها مقدرش يخبي إعجابه بيها، وعرض عليها مساعداته علشان يعني لو مش لاقية سكن أو محتاجة أي حاجة في مصر ..

لاحظ المنتج الكبير إعجاب عمرو بالبنت الروسية فميل على ودنه وقاله البنت حلوة صحيح بس خلي بالك يا عمرو، البت دي حبايبها هنا كتير، في إشارة مبطنة منه معناها ان علاقاتها كتير وممكن تكون شايلة عدوى مرضية خطيرة، لكن عمرو كان زي اللي ندهته النداهة، مكانش شايف ولا سامع أي تحذيرات، وبدأ بعدها يظهر مع البنت دي في أماكن كتير، وبعدها بفترة قليلة بدأت تظهر عليه أعراض مرضية لحد ما عمل فحوصات و تحاليل واكتشف إصابته بمرض الإيدز، ودي كانت الضربة القاضية لحياته الزوجية ..
لإن شيرين لما عرفت الخبر انهارت من الصدمة وطلبت الطلاق فورا .. ورغم ان عمرو كان متمسك بيها وبيحبها لكن مقدرش يرجعها عن القرار دا ..

بعد كدا سافر عمرو دياب برا مصر وقعد فترة كبيرة برا بيتعالج من المرض الخبيث دا ..
هتقولي وازاي عايش لحد دلوقتي، احنا معلوماتنا ان مرض الإيدز دا لسه محدش لقاله علاج في العالم كله لحد دلوقتي ..

هقولك لسه عايش طبعا عشان كل الكلام دا محصلش أصلا، ودي مجرد واحدة من إشاعات كتيرة اترددت على الفنان عمرو دياب ..

وهو بنفسه طلع ونفى الإشاعة دي في برنامج أيام في حياة الهضبة، وقال أعوذ بالله، متقولوهاش كتير بس هي مش حاجة حلوة، وانا قلت لازم اطلع أنفي عشان أبويا قلق عليا وسألني انت كويس ؟

ولو كان عمرو فلت من خبر إصابته بالإيدز أكيد مش هيفلت من خبر تغيير ديانته للمسيحية ..
دا غنى أغنية بيقول فيها ( لما جيتي يا عدرا ليا .. تمسحيلي دموع عينيا )
وقابل البابا شنودة وطلب منه انه يساعده عشان يعتنق الديانة المسيحية ويغير ديانته بشكل رسمي .
طبعا الدين لله والوطن للجميع وحرية الإعتقاد مكفولة لكل إنسان سواء كان مشهور أو مش مشهور، بس دي برضو إشاعة تم نفيها من عمرو دياب ومن مدير أعماله ..

زي ما اتقال عنه في فترة من الفترات انه مش مصري أصلا وانه يمني، مع ان عمرو دياب عاش واتربى في مدينة بور سعيد، دا كان لسه بيتكلم بورسعيدي لحد بدايات شهرته ..

كمان انتشر في وقت من الأوقات خبر ارتباط تامر حسني بنور بنت عمرو دياب، والحكايات كترت عن الموضوع دا، اللي قال ان تامر حصلت علاقة بينه وبين نور عمرو دياب والعلاقة دي اتسببت في ان نور حملت في طفل من تامر حسني وحصلت أزمة كبيرة بين الهضبة وبين المطرب الصاعد تامر حسني اللي كان رافض الجواز من نور أو الاعتراف بالطفل، لحد ما تدخل في الموضوع جمال مبارك ابن الرئيس الأسبق حسني مبارك اللي كانت بتربطه بعمرو دياب علاقة صداقة، جمال مبارك قابل تامر حسني بنفسه، وقاله يا تامر لم الموضوع، قدامك 24 ساعة بالظبط تنفذ فيهم وتتجوز البنت وإلا اعتبر نفسك ممنوع من دخول مصر طول ما احنا موجودين في الحكم ..

طبعا مش محتاجة أقولك ان الكلام دا كله من وحي خيال الشخص اللي بيألف الإشاعات،ومفيش حاجة منه حصلت، وكل القصة دي اتبنت على أساس ضعيف جدا وهو ان تامر في الوقت دا كان عامل أغنية اسمها نور عيني، فالناس قالت انه بيغنيها لنور بنت عمرو دياب ..
لكن اللي مش إشاعة بجد ان عمرو دياب غنى في شاطئ عراة ..

ودي بقى قصة حصلت بالفعل في أغسطس 2013 لما عمرو دياب أحيا حفلة غنائية في جزيرة ميكونوس اللي فيها شاطئ كبير للعراة، وشاطئ العراة دا للي مش عارف، هو شط عادي على البحر بس الناس هناك مش لابسين مايوهات، هما بصراحة مش لابسين أي حاجة خالص ..

والجرايد ساعتها هاجمت عمرو دياب جدا بسبب الموضوع دا، لكن عمرو قرر يلتزم الصمت ومحاولش حتى يدافع عن نفسه أو ينفي الخبر ..

#عمرو_دياب #فيديولوجي #
#بالورق_والمصادر

00:00 مقدمة
00:10 الشائعة الأولى الإيدز
02:17 الشائعة الثانية المسيحية
02:52 الشائعة الثالثة

#عمرو_دياب
#بالورق_والمصادر
#شائعات_وحقائق