رقم حجز الاستشارات والكورسات : ٠٠٢٠١١٥٠٥٨٦٠٥٢
النرجسي بيحب أولاده ،النرجسي اب حنون
بقالي خمس سنين متجوزة نرجسي ومعايا طفلين أعمارهم ٣ سنين وسنتين وابوهم النرجسي بيموت عليهم وهم متعلقين بيه جدا جدا فازاي النرجسي مش بيحب أولاده ؟ طيب قولي لي مين قال لك انه نرجسي؟ عرفتي ازاي؟ طبعا كل الفيديوهات منطبقة عليا . طيب زي ايه يعني ؟ مثلا هو كان كويس جدا في الخطوبة وكان بيحترم ابويا وبيخاف منه ، بعد ما اتوفى بابا اتحول لشخصية تانية تماما وبدأ الخناق ووهي حامل اول حمل لها طردها من البيت وبعدين بعد كدة بقى بيطردها هي أولادها بالرغم من انها هي اللي بتصرف ع البيت واشترت له سيارة من راتبها وهو دايما معهوش وشغله بيخسر المهم اخر حاجة رفعت طلاق واتطلقت وحاول يدخل عندها مافتحتش راح طلب الشرطة وقال لهم انها حابسة الأولاد في البيت او اهملت وضيعت المفتاح المهم انه طلب لها الشرطة وقال مهملة في أولادها وطبعا الشرطة جت والأولاد اتخضوا وخافوا واتقيد ضده بلاغ كاذب ، وقبلها هو اتهجم عليها في الشارع ادام الأولاد والأولاد برضه يتخضوا ويصرخوا ويحصل لهم رعب .
طيب انا حكيت كام موقف من اللي هي حكته وهي كمان بتقول انها حكت باختصار وكل دة في خمس سنوات جواز كل دة والأولاد في اعمار صغيرة اد ايه وشافوا مع ابوهم ايه ، طيب هل انتوا شايفين كدة ان الاب دة بيحب أولاده؟ ماشي هو في أوقات تانية بيشيل ويلاعب ويدلع بس من غير مايدفع فلوس مابيصرفش عليهم هي اللي بتصرف ع البيت وكل دة وهم عايشين في الخليج يعني هو يقدر يصرف عليهم كويس .
طيب اللي بيحب أولاده يجيب لهم الشرطة في البيت ويعمل لهم الرعب دة ؟ اللي بيحب أولاده يطردهم ويطرد امهم من بيتهم ؟ اللي بيحب أولاده مش بيصرف عليهم؟ اللي بيحب أولاده بيتهجم على امهم في الشارع ويعمل لهم هلع بالشكل دة ؟ فين بقى قلبه لما كان بيعمل كدة ؟ تخيلي انتي نفسك واقفة تتفرجي ع الموقف دة كأنه بيحصل لواحدة غيرك وانتي شايفة الأطفال والرعب اللي هم فيه قلبك حيتخلع ازاي عليهم انتي غريبة وفي الشارع وحتتعاطفي ازاي مع أطفال اول مرة تشوفيهم في حياتك وحتكوني اد ايه متغاظة من الشخص اللي بيرعبهم ،وأول حاجة حتقوليها ايه؟ دة معندوش قلب هو ازاي كدة ؟
طيب امال ايه اللي بيكون حاصل لما بيدخل من باب الشقة يشيلهم ويحضنهم ويبوس فيهم ويقعد يلعب معاهم ؟ حقول لك .هل دة بيحصل كل يوم وهل هو بيقعد يتكلم معاهم ويديهم فرصة يتكلموا ويعبروا عن نفسهم وعن مشاعرهم وهو بيقبل المشاعر دي ومايعدلش عليهم ويقول لهم لا مش مفروض تحسوا كدة ومش مفروض تقولوا كدة؟ هل هو كل يوم يقعد معاهم يلعب ويسمع لهم بدون مايوجه ويرشد طول الوقت بشكل مبالغ فيه ؟ يعني الطبيعي ان الاب السوي بيصحح أخطاء الطفل بمعدل مرة في اليوم او مرة كل يومين ثلاثة على حسب التصرفات وتكرارها وعمر الطفل وحاجات كتير ، لكن الاب النرجسي لقائه باولاده عبارة عن انتقادات وتوجيهات ولو صغيرين اوي بيكون بيلعب معاهم العاب يكسبها هو ودايما يستمتع باللعب معاهم عشان هو يكسب ،راقبيه وهو بيلعب معاهم وشوفي ، دا اذا أصلا لعب يعني ..راقبي النرجسي عشان تعرفي اذا بيحب أولاده ولا لا وانا بقول لك هو مش بيحبهم ،بس انتي راقبي بنفسك وانتي حتعرفي ، لو لقيتيه بيقاطع الطفل ويقول له انت بترغي كتير ، او رد فعله ع الطفل بيكون عنيف ومش منطقي ،واذا بيعاقب الطفل على خطأ تعليمي لازم أي طفل يغلطه عشان يتعلم زي انه يكسر كوباية او يكب اللبن او يقع وهو ماشي او ينط فيتخبط ، التصرفات اللي الطفل لازم يعملها عشان يتعلم واللي مفروض ان موقفنا فيها يكون تهدئة لروع الطفل ونحسسه ان عادي نغلط بس ناخد بالنا عشان مانتئذيش تاني ونعلم الطفل ان هنا فيه نتيجة مش حلوة للغلطة دي مش نمسكه نضربه ، ودة بيكون رد فعل النرجسي ، فاذا لقيتي كل دة حاولي تعقلي الموضوع هل دي تصرفات حد عنده قلب أصلا عشان يحب بيه؟
طيب امال بيترعب عليهم لو تعبوا ويقعد يزعق لي عشان اكلهم ودواهم وبيجري بيهم ع الدكاترة دة اسمه ايه؟
دة اسمه ماصدق يلاقي حاجة ينظر فيها عليكي ويوجهك وينتقدك ويتقرفك ويقول لك عملتي وماعملتيش وقصرتي وماقصرتيش ، ورعبه عليهم وجريه ع الدكاترة ومش كل النرجسيين كدة فدة لانهم امتداده ولازم يحافظ على امتداده
وبيحبهم ويحضنهم لنفس السبب ،بس استني لما الولد يبدأ يقول لا وانتي حتشوفي الوجه الاخر معاهم