أقوي وصفه كحك هتجربيها كحك العيد الدايب الناعم اللي هيشرفك قدام ضيوفكالكحك عالسخن بالسمنه المقدوحه بطريقه زمان
#هنا_صلاح
#كحك_العيد
مقادير الكحك:
كيلو دقيق
٥٥٠جرام سمنه
كوب من السوايل ٢٠٠مللي(ممكن نستخدم كله لبن او كله مايه او نص لبن ونص مايه)
معلقه صغيره خميره
نصف معلقه صغيره بكينج بودر
٣معلقه كبيره سمسم
٣معلقه كبيره سكر
رشه ملح
ازازه روح الموز+فانيليا
نصف كيلو ملبن+معلقه سمنه
التسويه:
فرن مسخن مسبقا رف اوسط علي درجه حراره ١٨٠ل ٢٠٠ من ١٥ل ٢٥دقيقه بالكتير
ملحوظات مهمه:
١أهم خطوه في الكحك هي بس الدقيق كويس جدا بالسمنه
٢بعد اضافه السوايل مجرد بنقلب بس ممنوع نعجن كتير علشان الجلوتين ميشتغلش والدقيق يعمل عرق والكحك يبقي ناشف
٣كميه السوايل كوب ٢٠٠مللي لو هنستخدم الكوب المعياري يبقي كوب الا ربع ممنوع نزود سوايل اكتر من كده علشان الكحك ميبقاش ناشف بس طبعا الدقيق بيختلف من نوع للتاني وفي دقيق بيحتاج سوايل كتير ودقيق لا فممكن نزود معلقه او معلقتين مايه بالكتير لو لقينا العجينه بتشقق
٤لو العجينه بتشقق معاكي مش نستعجل في اضافه الماء
بندفي كوره العجين بين ايدينا كويس ونختبرها تاني الاول قبل اضافه اي سوايل زياده
٥بالنسبه للتسويه الكحك الساده بيستوي علي حراره ١٦٠ل١٧٠ لمده ٣٠ل ٣٥دقيق
الكحك بعجوه علي درجه حراره ١٨٠ لمده ٢٥دقيقه
الكحك الملبن على درجة حرارة ١٨٠ل ٢٠٠ لمده من ١٥ل ٢٥دقيقه بالكتير مش نزود في مده التسويه علشان الملبن مينشفش منك او يفور من الكحك
وطبعا مده التسويه بتختلف علي حسب كل فرن
٦الكحك مش بسيبه يخمر مجرد بسيبه يرتاح عشر دقايق علي ما نحضر الحشوات بتاعتنا
٧لو عامله كميه كبيره او خدت وقت فالتشكيل او الجو حر ببدء تسويه علطول بأول صاج انا شكلته لكن لو عامله كميه بسيطه وخلصت علطول بسيبه نص ساعه يرفع شويه وبعد كده ببدأ اسخن الفرن واسويه
٨منزودش خميره وبكينج بودر عن كده علشان يفضل الكحك محتفظ بالرسمه بتاعته