تعديل سلوك النرجسي يعني توقفيه عند حده وتقللي اضراره مش تعالجيه
تعديل سلوك النرجسي مش يعني تعالجيه ابدا فيه فرق كبير بين تعديل السلوك والعلاج ، ياحبيباتي يا مقاتلات ياقويات تعديل السلوك وارد جدا انه يتعمل للنرجسي ودة كلام دكتور راماني مش كلامي وانا قلت لكم قبل كدة ان تعديل سلوكه مش بيكون تعديل تام دة بيكون بنسبة معينة بس بتكون مرضية الى حد ما ، المهم انا عملت الفيديو النهاردة عشان ارد ع الناس اللي قالت في تعليقات فيديو ازاي تعدلي سلوك النرجسي اني بتناقض مع نفسي لاني قلت انه مش بيتعالج ، انا ماقلتش ابدا انه مش بيتعالج بالعكس انا عاملة فيديو نقلت فيه رأي علماء النفس المعاصرين اللي قالو ممكن علاجه لكن مش بسهولة وبمجهود ولازم طبيب او معالج ، دي نقطة ،النقطة الأهم ان تعديل السلوك مش علاج ، تعديل السلوك يعني انتي تخليه يتعامل معاكي بطريقة لائقة يعني يغير سلوكه في معاملته معاكي ومع اولادك وبالتالي تقليل الاضرار ، والدليل على انه بينفع حتى مع النرجسي العنيف انك لو عملتي له محضر لمايضربك بيخاف ومش بيمد ايده تاني انا عارفة ان مش في كل الحالات دة بيحصل لكن حصل في حالات كتير جدا ، الفكرة هنا في انك كنتي بتحاولي وانتي مش متعافية تماما او انك كنتي ضعيفة او انك بتحاولي عشرين وثلاثين سنة وانتي مش عارفة انه نرجسي فلما بتحاولي تعدلي سلوكه بتعرفيه بالذوق والادب ان تصرفه ضايقك وبكدة بيعرف نقطة ضعف عندك او انك بتنفجري فيه وتزعقي وبالتالي ياخد وقود وينبسط فعمره ماحيبطل ، لكن انتي لو تعافيتي وبقيتي قوية والله والله بيشم ريحة قوتك وبيشم ريحة ضعفك والله بيحس من عينك انتي خايفة ولا لا وبيخاف لما يلاقيكي جادة في كلامك معاه ، الفكرة انك لما تحاولي تعدلي سلوكه وانتي فاهماه وعارفة انتيب تعملي ايه غير لما تكوني بتحاولي تعدلي سلوك شخص سوي ، ومع ذلك مش كل النرجسيين حينفع نعمل لهم تعديل سلوك يعني الخبيث السيكوباتي والثالوث دول برة المعادلة الا اذا انتي بقيتي جريندايزر نرجسي وبرضه الدليل على كدة ان لو اتجوز نرجسية اقوى منه بتذل انفاس اهله وبتقدر تكبت نرجسيته ، فتعديل السلوك مش مقصود بيه ابدا انك تعالجيه ولا انه حيبقى انسان سوي ولا انه حيبقى مريح وكيوت لا خالص دة مش وارد ،
المهم حديكو مثال عشان واضح ان الفيديو كان سريع ومكنش وافي ولا كافي عشان كدة عمل لخبطة وانا كنت نفسي انزل الحلقة دي تاني يوم له لكن ماامكنش للأسف . المهم حقولك احدى الحالات كانت بتشتكي ان النرجسي كل ماتنزل معاه محلات تشتري لبس لها ولا لاولادها يخليها واقفة بتبص على حاجة ويختفي فجأة وهي تلف تدور عليه في المحل متلاقيهوش وتخرج تلاقيه واقف برة يتفرج عليها وهي بتدور عليه وفي ايدها عيالها يعني تنتبه لاولادها ولا للبيه الكبير اللي بيختفي ،المهم قلت لها لما يعمل كدة قولي له انت ازاي بتخرج وتسيبني كدة حيقول لك وانتي حتتوهي؟ قولي له لا مش حتوه انا مش بلاقيك وبدور عليك في المحل كله لاني معرفش انك خرجت لو سمحت ماتعملش الحركة دي تاني بمنتهي الحسم تقوليها ، حيقول لك وايه يعني ماتدوري قولي له يعني ابان زي العيلة اللي تاهت من ابوها وبتدور عليه ، انت عايز الناس تفكر كدة عادي انا عايزة الناس تفكر كدة انت بقى حر في نفسك . قلت لها ودي اخر كلمة تقوليها وغيري الموضوع ، وفعلا نفذت الكلام بالحرف الواحد وانتوا عارفين اغلب النرجسيين بيتجوزوا اصغر منهم بكتير او زوجاتهم بيكونوا اجمل الجميلات ودي بتكون نقطة ضعف عندهم ان الناس دايما تفكر انه ابوها من كتر ظلام وشه ،المهم الحالة لما نفذت الكلام انتهى الموضوع ماتكررش تاني لفترة طويلة وطبعا بعد فترة بيجرب تاني نفس الحاجة عشان يشوف انتي حتتمسكي بحدودك ولا لا ولما بيلاقكي متمسكة بيها بيرضخ وبيتراجع ،الفكرة هنا في قوتك مش في قوته هو لان احنا متفقين ان قوته وهم في خياله وخيالك ،لكن قوتك حقيقية لكن مدفونة جواكي زي ماضعفه مدفون جواكي ،
أتمنى أكون وضحت اللي مكانش واضح في فيديو ازاي تعدلي سلوك النرجسي ،عشان الناس اللي حاولت تفهم اني عايزاها تعدل سلوكه عن طريق تعديل سلوك نفسها من الخوف والانهيار والضعف للقوة والتمسك بحقوقها وبقوتها ، ودة لايتعارض ابدا مع انك تديه فتات خبز ووقود إيجابي لما يعمل حاجة كويسة ترضيكي
لي تعليق صغير ،لما نختلف في التعليقات مفيش داعي نهاجم بعض ، بعض الناس لما حد يرد عليها بحاجة مخالفة لرأيها تهاجمه وتقول له الله يشفيكي وانتي كذا طب ليه ليه منبقاش عندنا ثقافة الاختلاف ليه بنعمل زي النرجسي لما مايقبلش اننا نختلف معاه ، كل واحدة زوجها مختلف عن زوج غيرها وفيه ناس بتقدر وناس لا ومفيش حد زي حد فلازم نحترم وجهات نظر بعض كلنا في مركب واحد ياحبيباتي وكلكن مجروحات ومرهقات فان مانتوش انتوا تراعوا بعض مين حيراعيكم